GOIENAk udaltzaingora deitu du, baina udaltzainek ez dute informaziorik helarazi gura izan; azaldu dutenez, datuen babeserako legea hartzen dute oinarri informaziorik ez emateko.
Auto kaltetuetako baten jabeak honela azaldu dio GOIENAri gertatutakoa: "Goizeko zortzietan kalera irten naiz, eta autoa normal aparkatuta zegoela ikusi dut. Etxera itzuli naiz, eta gero bederatzietan leihora irten naiz, eta auto bat iraulita ikusi dut errepide erdian. Nirea zela uste nuen eta senarra iratzarri dut, gure autoa irauli dutela esanez. Kalera irten gara, eta hori ez zen gure autoa. Gurea errepide erdian zegoen, kolpatuta. Susto handia hartu dugu. Auto zuria erdian zegoen, eta gurea horren aurrean. Atzekoak kolpe txikia jaso du. Zuriari eman dio kolpe gogorra, eta irauli egin denez, gureari eman dio. Beraz, gure autoa errepide erdian agertu da. Batzuek 140 kilometro ordura zihoala esan digute, beste batzuek 180ra.".
Beste kaltetuetako batek istripua eragin duen autoa abiadura handian zetorrela adierazi du: "Abiadura handian zetorren autoa. Auto zuriari gogor eman dio, eta horrek nirearekin talka egin du. Eszenan ikusten da, nola joan den... Eta beste autoa hemendik urrun bukatzeko oso ondo ez zihoan... Orain garabiaren zain gaude. Atestatua eginda dago eta udaltzainen bulegora heldu ostean aseguru etxeen txanda izango da. Ea konpontzen den. Nik autoa konpontzea espero dut".
