Mojategin gelditu dira hiru puntuak, Mondrak gogor borrokatu eta markagailua irauli ondoren. Izan ere, Añorgak ezustekoa eman du –sailkapeneko azken postuetan dago taldea– eta norgehiagokako 10. minutuan eskuratu du gola. Horrela, Arrasateko taldeak kontrako emaitzari aurre egin behar izan dio.
Berdinketaren gola Iker Sanchezek eskuratu du bigarren zatiko bosgarren minutuan, bere anai Axierren pase bati esker. 1-1ekoarekin erosoago ibili da etxeko taldea Mojategiko berdegunean, eta neurketako 54. minutuan, Iker Sanchezek 2-1ekoa ezarri du markagailuan.
Ohorezko Erregionalezko beste partidei dagokionez, Bergarak 0-0 berdindu etxetik kanpora Amaikak Bat taldearen kontra, eta UDAk porrota jaso du (2-1) Irungo Real Unionen aurka. Mondraren garaipenari esker, arrasatearrek Bergara gainditu dute sailkapenean.