Barne prozesu baten ostean, aukeratu dute Garcia udal hauteskundeetarako zerrendaburu. Orain, zerrenda hori osatzea dute helburu, eta horrako izenak eta sozialisten programarako proposamenak jasotzeko, dei egin die herritarrei. "Euren proposamenak eta ekarpenak behar-beharrezkoak ditugu hauteskundeei begirako programa osatzen joateko. Herriaren eta herritarren alde egingo dugu lan, orain arte egin dugun moduan. Hori da gure konpromisoa", esan du Oscar Garciak.
Konpromiso horren adibide ipini ditu oraingo agintaldian egindako hainbat lan eta proiektu. Besteak beste, doako wifi publikoa, Gabonetako argiteria, Makatzenako igogailua, garbitasun ordenantza, kale garbiketako kontratu berria, Erdi Aroko azoka, Gaming Day egitasmoa, parkeen eraberritzea, asfaltatze lan handia...
Aita gogoan
Gipuzkoako PSE-EEko idazkari nagusi Eneko Anduezak bere aldetik, "babes osoa" eman dio Garciaren hautagaitzari. "Erakutsi dute lanerako duten gogoa, eta bide beretik jarraituko dutela badakigu", esan du. Era berean, balioan ipini du Garciak eta bere taldeak udal gobernuan egindako lana. Azpimarratu du ez dela "erreza sozialista izatea inon". Are gutxiago, Arrasaten.
Bestalde, Oscar Garciaren aita, Paco Garcia gogora ekarri du aurkezpen ekitaldian. "Paco eredugarria izan da guretzat. Pertsona moduan, politiko moduan eta sozialista moduan. Eta ezaugarri horiek guztietatik ikasi eta edan du Oscarrek. Hortaz, ez daukagu zalantzarik Arrasaterendako hautagai onena dela".
Zerrenda, martxoaren 3rako
Hautagaia aurkeztu ostean, udal hauteskundeetarako zerrenda osatzen dihardute Arrasateko sozialistek. Beranduenera, martxoaren 3rako prest eduki behar dute zerrenda hori.
