Lehen itzuli zaila eduki eta gero, azken partiduetan gora egin du Kanpazar ART taldeak. Gaztedi hirugarren sailkatuaren aurka sorpresa eman eta gero, etxetik kanpo jokatu dituzte Igor Isasiren mutilek, eta bietan, bonus puntu bat eskuratzea lortu dute. Hori horrela, duela aste batzuk azken sailkatu izan eta gero, gaur egun zazpigarren dira, putzutik hiru postu gorago.
Azken emaitzek taldeari hauspoa eman diote, eta, kontrario zuzenen aurkako partiduak iristen diren bitartean, etxeko norgehiagoketan, aurrean kontrario gogorrak izan arren, gozatzeko helburuarekin zelairatuko dira.
Datorren asteburuan, Iruñeko La Unica taldeak bisitatuko du Mojategi. Nafarrak bosgarren dira sailkapenean, partidu bat gutxiagorekin. Lehen lau postuetara salto egiteko derrigorrezkoa dute garaipena, eta kontuan hartuta joaneko partidua 37-11ko emaitzarekin amaitu zela, partiduak ez du erraztasunik emango. Baina sorpresak existitu existitzen dira.