Azkoitiko Elkargunean jokatu zen pasa den asteburuan Gipuzkoako Karate Txapelketa eta bertara, lau modalitate ezberdinetan parte hartzeko asmoz, Saioa Karateko bost ordezkari gerturatu ziren. Emaitzak gainera, ezin hobeak izan ziren, guztira 8 domina eskuratu zituztelako.
Kata modalitatean, banaka, Markel Elorzak hirugarren amaitu zuen. Taldekakoan aldiz, bigarren amaitu zuen Markelek berak, Iosu Madinabeitiak eta Aitor Lasagabasterrek osatutako hirukoak.
Talde honek berak Gipuzkoako Txapeldun izatea lortu zuen Kumite modalitatean. Eta banaka, senior mailan 75 kilo azpikoetan, Markel Elorza txapeldunorde izan zen final oso parekatu batean. Lehen aldiz txapelketa batean parte hartzen zuen Martxel Tejedorrek berriz brontzearen lehian ezin izan zuen garaipena eskuratu.
Emaitza bikainak izan dira beraz, eta bai Euskadiko eta baita Autonomien arteko txapelketak prestatzeko bultzada handia jaso dutela ziurtatu dute Saioa Karate Klubetik.