Gaztetxea umez eta gurasoz bete da beste behin eta harrera beroa izan du Guraso eta Haur Asanbladak antolatutako ekimenak.
Sormena, oinarri
Adinaren arabera, ume txikiagoek eta handiagoek aukera izan dute askotariko sormen jokoekin jolas egiteko. Ume txikienak, esaterako, kartoizko arrautza kaxekin edota komuneko paperaren bilkariekin jolasean ibili dira. Nagusiagoek, aldiz, makedo eraikuntza jokoan ibiltzeko aukera izan dute. Izan ere, kartoi ugari zeukaten bertan, eta adibidez, tunel itxurako eraikuntza bat egiten ibili dira bertaratu diren lagun batzuk. Tunelaren goiko aldea, oihalekin estali dute, gainera.
Gaztetxearen filosofiarekin bat
Asanbladako kide den Itsaso Galarraga gurasoak esan du jende dezente bertaratu denez, pozik gelditu direla. Eta gaineratu du gaztetxearen filosofiarekin bat egiten dutela halako ekimenek: "Autonomoak izaten erakusten digute halako ekimenek, guk egindako gauza gutxirekin, ondo pasa daitekeela erakusten digute", adierazi du.
Txokolate beroa dastatzeko aukera ere izan dute gero, eta azkenik, asanblada egin dute, balorazioa egiteko.