"Gizarte osasuntsu bat, gizarte kohesionatu bat da, inor atzean uzten ez duen gizarte bat, horretarako beharrezkoa da gizarte zerbitzuetan inbertitzea eta hori gizarte osoarentzat da onuragarria" azaldu du Maria Ubarretxenak, hirugarren postua bigarrenez jarraian lortu ostean. Arrasateko alkateak etorkizunean ere bide horri eustea beharrezkoa dela dio eta Udalaren kontuen egoera ona dela eta etorkizunean inbertsio horri eustea ere posible izango dela adierazi du.
Gizarte zerbitzuetan egiten duten inbertsioari dagokionez, Espainiako Estatuaren Gizarte Zerbitzuen Zuzendari eta Kudeatzaileen Elkarteak bikaintzat jo ditu estatu mailako 31 udalerri. Izendapen hori jaso ahal izateko honako baldintzak bete behar dira:
- Gizarte zerbitzuetan urtean, biztanle bakoitzeko, 100 eurokotik gorako inbertsioa egitea.
- Aipatu inbertsioa aurreko urtekoa baino txikiagoa ez izatea.
- Gizarte gastua aurrekontu orokorraren % 10etik gorakoa izatea.
- Udalak finantza-gardentasunaren printzipioa betetzea, hau da, datuak gardentasun atari batean kontrastatzea posible izatea.