Gaineratu dute: "EAJ-PNVko gizon eta emakumeak beldurtzea helburu badute ez dute horrelakorik lortuko". Era berean, bizikidetzaren alde egindako apustua berretsi dute, eta "bizikidetza apurtzen duten ekintza horien aurrean" ez dutela atzera pausorik emango gaineratu.
Arrasateko udaleko indar politiko guztien parte hartzearekin orain dela bi urte abian jarritako Oroimenaren eta Elkarbizitzaren mahaiak egindako lanak hainbat emaitza eman dituela adierazi dute: "EAJ-PNVk argi du, beraz, hori dela bidea, elkarrizketa, elkarlana eta elkarrenganako errespetua, eta bide horretan ez daukate lekurik horrelako ekintzek. EAJ-PNVk bizikidetzaren alde lanean jarraituko du, bere bideari eutsiz, inposaketen aurrean amore eman gabe". Eta mahaia osatzen duten alderdiei ausardia eskatu diete: "Publiko ager daitezela akzio guzti hauek salatzen. Bestela, argi utziko dute elkarbizitzari ekin dioten bidea ez dela izan zintzoa". Bukatzeko, "bizikidetzan eta errespetuan oinarritutako Arrasate aske" baten alde egin dute.
