Sumision City Blues talde gasteiztarrak eta Señor No donostiarrak erdi bana kaleratu duten singlea aitzakia ederra hartuta, kontzertu izerditsua egingo dute beraientzat plaza kuttuna den Arrasateko gaztetxean. Pare bat urte pasa dira Señor No-k Arrasaten azken aldiz jo zuela, eta taldea berriz ikusteko gogotsu daude zaleak. Sumision City Blues talde gasteiztarrak, bestalde, bere blues berezi eta rockand-rollarekin guztiak dantzan jarriko ditu. Gainera, agur biran dago sartuta taldea eta Arrasatekoa izango da joko duen azken kontzertuetako bat. Emanaldi berezia izango da, beraz, gaurkoa, eta, berezia den heinean, ostiralean egingo da ostegunean beharrean, Kooltur Ostegunen barruan ohikoa den tankeran.
Hilabete bukaera arte egongo da musikarekin gozatzen jarraitzeko aukera gaztetxean. Izan ere, sona hartzen ari den Nerabe taldea izango da urtarrilaren 17an, Dead Furies estoniarrak izango dira astebete geroago eta Giante urtarrilaren 31n.