Bertsolari gazteen Xenpelar Saria, 1971an sortu zen. Zortzi urteko etenaldi baten ondoren, Ereintza Elkarteak hartu zuen antolaketaren ardura, eta azken aldian, bi urtez behin antolatzen da.
Aipatutako bi bertsolariez gain, Jon Gurrutxaga, Joanes Illarregi, Jokin Bergara eta Aitor Salegi aritu ziren atzoko finalean. "Ariketa asko izan ziren buruz-burukoaren aurretik: bi ofizio, bi puntukako erantzun, bederatziko txikian bertsoak aurrez hitz bat eman ostean, puntuka eta bakarka. Denetan zailena, akaso, bederatzikoa izan zen. Nire kasuan adina hitza jarri zidaten gai bezala".
Lehen ariketen ondoren, Eli Pagolarekin aritu zen nor baino nor, txapela poltsikoratzeko buruz-burukoan. "Azken txanpan gusturago aritu nintzen lehen fasean baino. Pagolarekin batera oso gustura aritzen naiz, eta pozik nago egindako lanarekin".