Azken bi asteburuetan ez du MU Ointxe!-k nahi bezalako emaitzarik eskuratu. Bai etxean Ardoiren aurka jokatutako partiduan eta baita Pas Pielagos talde kantabriarraren kantxan jokatutakoan, taldeak oso maila ona eman du, atsedenaldira arte. Hortik aurrera, baina, arazoak eduki ditu, eta badirudi luze samar egin zaizkiola norgehiagokak.
Ardoi nafarren aurka galdu zuten arte, jarraian bost partidu irabaziak zituzten mondragoetarrek, eta lehen postuen borrokan bete-betean sartzea lortu zuten. Bi porrot horiekin, baina, taula erdira jaitsi dira Iñaki Ogararen mutilak; hala, egoerari buelta emateko, Easoren aurkako derbia aprobetxatu nahi dute. Talde donostiarra goiko postuetan egotera ohitu da aurreko urteetan, baina aldaketa asko izan ditu udan, eta urte zaila izaten ari da.
Mondragon Unibertsitatea Ointxe! da, berez, faborito derbian, baina ez du ohiko lekuan jokatuko, Musakolako kiroldegian jokatuko baitu zapatuan.