Jokoan sartzea kostatu egin zitzaiela kontatu du Mondrako entrenatzaile Jorge Davilak: "Ez ginen ondo atera, eta hasierako minutuetan eurak nagusitu ziren. Lehenengo zatiaren erditik aurrera hobeto sartu ginen jokoan, eta bi taldeok gola sartzeko aukera asko izan genituen arren, ez zen golik izan. Bigarren zatian, lehenengoan baino hobeto ibili ginen gu, eta Santxoren golarekin aurretik jarri ginen. Zoritxarrez, baina, partida kontrolpean genuela uste genuenean, akats bat egin genuen, eta ondorioz, Hernanikoek berdindu zuten markagailua. Hainbat minututan gure jokoa gailendu bazen ere, ezin izan genuen besterik sartu, hortaz, puntu bakarra eskuratu genuen atzokoan".
Datorren astean, Mutrikura
Sailkapeneko gorengo lekuetan dago Mondrak datorren asteburuan aurrez-aurre izango duen Mutriku, hortaz, partida gogorra izango dela aurreikusten du Davila entrenatzaileak: "Aurkari zuzena da Mutriku ere, eta zaila izango den arren, goiko postuetan jarraitu gura badugu, behar-beharrezkoak ditugu handik ekarri gura ditugun puntuak".
