Denboraldi hasiera zaila izaten ari da Kanpazar ART taldearentzat. Partidarik ezin irabazi dabil eta puntuak batzea ere zail egiten ari zaio Igor Isasik zuzentzen duen taldeari. Baina bide aldapatsu honetan, momentu honetan, emaitzak ez dira gehien arduratzen dutena talde barruan, min hartutako jokalari kopurua baita benetako buruko minak ematen ari dena.
Horren erakusgarri garbiena da Ordizian pasa den asteburuan pasa zitzaiena arrasatearrei. Igor Isasik 12 jokalari bakarrik zituen erabilgarri, mailako lider eta igotzeko hautagai nagusietako bat denaren aurka jokatzeko. Zeukaten guztia eman zuten mutilek, eta entsegu batekin markagailua itxuratzen saiatu ziren, ordurako jada 11 jokalarirekin zirela zelaian. Atsedenaldira heldu zirenerako, baina, beste hiru jokalarik hartu zuten min, eta epaileak, egoera ikusita eta araudiari jarraituz, partidua bertan behera uztea erabaki zuen, 31-5 emaitzarekin.
Zorionez, azaroaren 18ra arte atsedena izango dute arrasatearrek eta denbora tarte hau ondo etorriko zaio taldeari, min hartutako jokalariak berriz prest izateko
