"Etorkizunari bidaia, gizakiaren eboluzioa, nora goazen" kontatzen du Gernikako dantzari eta koreografo Ziomara Hormaetxek gidatzen duen Biopiracy izena duen eta dantza eta teknologia berriak uztartzen dituen ikuskizunak. "Gizakiarengan mutazio bat ikusten dut; hortaz, sentimenduen eta sentimenduen desagertzearen arteko borrokari buruzko kontakizuna egiten dugu. Orain arte egin ditudan lanak bezala, honako hau ere oso lan bisuala da".
Taularen gainean hiru dantzari izango dira: Hormaetxez gainera, Gasteizko Aritz Lopez eta Bartzelonako Marc Lapuerta, baina horien atzean dagoen pantaila handia ere dantzari bilakatuko dutela dio koreografoak: "Eskarmentu handia duten Antonio Verak eta Paco Gramajek egindako bideo murgiltzearen eta bideo interaktiboen bidez, ikuskizun bizia eta erraz ulertzekoa da eskainiko duguna".