Mikel Gonzalez de Martin: "Ez nago ohituta, baina gauza polita da tituluak irabaztea"

'Gontxa', bere seme-alabekin, Superkopa eskutan dutela.

Pasa den zapatuan jokatu zuten Txipreko Superkopa iazko Liga txapeldunak –Apoel Nikosia– eta kopa txapeldunak –AEK Larnaca–. Azken hau izan zen irabazlea, penaltietan. Hala, bere ibilbide profesionaleko bigarren titulua eskuratu zuen Mikel Gonzalez de Martin Gontxa arrasatearrak. Realarekin lortu zuen lehena, Bigarren Mailako txapeldun izan eta igoera lortu zutenean –2010ean–.  "Oso pozik" azaldu da lortutakoarekin.

"Ez nago ohituta, baina gauza polita da titulu bat irabazi, kopa jaso, eta lagunekin ospatzea. Gainera, taldeak ez du sekula titulu hau irabazi, eta horrek are politago egiten du lorpen hau", adierazi du arrasatearrak. Partiduan bana berdindu ostean, penaltietan irabazi zuen AEK Larnacak.

Dinamika onean

Denboraldia dinamika onean hasi dutela azpimarratu du Gontxa-k. "Europa Leaguerako sailkatzea lortu dugu, eta liga hasiera ona egin dugu, partidu bat irabazi eta bestea berdinduta". Era berean, adierazi du azken urteetan AEK Larnaca moduko taldeak indartzen ari direla pixkanaka, eta herrialdeko talderik indartsuena den Apoel Nicosiaren mailara gerturatzen.

Txipren, "oso pozik"

Bizitzen ari den esperientziari dagokionez, "oso pozik" dagoela nabarmendu du. "Klubak eskaintzen didan tratua oso ona da, emaitzak laguntzen ari dira, hiria gustatzen zait, eta familia ere gustura dago hemen. Banuen horrelako esperientzia bat bizitzeko gogoa", azaldu du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.