Udalak neurriak hartuko ditu hizkuntza-praktika horiek posible egiteko eta etorkizunean eutsi ahal izateko. Horrez gain, eta ekimenaren sustatzaile gisa, udal barruan ez ezik, udalerrian ere herritarrak gonbidatuko ditu Euskaraldia ekimenean parte har dezaten, eta izena emateko bideak erraztuko ditu.
Atzo egindako agerraldian, Udal korporazioko kideek berretsi egin zuten Euskaraldia Udal barruan eta herrian sustatzeko konpromisoa, eta zinegotzi bakoitzak ahobizi edo belarriprest izango dela adierazi zuen. Era berean, herritar guztiak gonbidatu nahi izan zituzten ahobizi eta belarriprest izatera. Inertziak astindu eta 11 egunez euskaraz aritzea izango da helburu nagusia, gure hizkuntza ohiturak aldatzen hasteko. Izen-ematea zabalik dagoela ere gogorarazi zuten: BAZen, AEDn eta www.euskaraldia.eus en.
