Lapurretak ugaritu egin dira azken astean

Hiru gertakari izan dira azken zazpi egunetan. Gaur zortzi, Salegi harategian sartu ziren lapurrak. Ostiral gauean, aldiz, Mesedeetako Amako aparkalekuan zortzi autoetako kristalak apurtu zituzten. Eta asteko hirugarrena, domeka goizaldean Basati tabernan izandako lapurreta izan da.   

"Uda nahiko lasaia izan da, baina delinkuentzia kasuek gora egin dute azken astean. Asko izan dira oso denbora gutxian". Hitz horiek erabili ditu Arrasateko udaltzain batek, azken asteko lapurreta gorakadaren harira. 

Azken kasua, atzo goizaldean Ferrerias kaleko Basati tabernan egindako lapurreta izan da. Kanpoaldeko pertsiana indarrez zabaldu ostean, ateko kristal bat hautsita lortu zuten barrualdera sartzea lapurrek. Behin bertan kaxa erregistratzaileko, makina txanpon jaleko eta tabako makinako dirua ostea lortu zuten. Tabernako arduradunek salaketa jarri dute, eta Ertzaintzak martxan du hori argitzeko ikerketa. 

Autoetako kristalak, apurtuta

Bariku gauean aldiz, Mesedeetako Amaren ikastetxeko aparkalekuan hainbat autoren kristalak apurtu zituzten. Udaltzainek zortzi apurketa zenbatu zituzten zapatu goizean bertaratu zirenean. Kristalak oraindik lurrean daude, baina Udaltzaingoan eta Ertzaintzan ez dute gertakari horiekin lotutako salaketarik jaso oraindik. 

Lehen kasua, Salegin

Salegi harategikoa, gaur zortzi izan zen. Lapurrak Otalora etorbideko atearen gaineko  leihotik sartu ziren, hau apurtzera heldu gabe. Kutxa erregistratzailea, eta txanponak eraman zituzten, eta salaketa jaso ostean Ertzaintzatik adierazi dute ikerketa martxan dutela. 

Irudia: Orain babestuta dagoen ate gaineko leihotik sartu ziren lapurrak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.