goiena.eus

Kontzertuz jositako uda dute aurretik Perlata taldekoek

  Kultura  Arrasate

Abuztutik irailera bitartean bederatzi zuzeneko eskainiko dituzte Gipuzkoan, Bizkaian eta Nafarroan zehar. Getarian izango da lehena, zapatuan, hilak 4.

Duela bi aste egindako elkarrizketan, udan ahalik eta kontzertu gehien jotzeko asmoa zutela esan zuten Perlatako kideek, eta, aste honetan iragarri duten kontzertu sortarekin, badirudi helburua majo beteko dutela. Abuztuaren 4tik irailaren 29ra bitartean bederatzi kontzertu lotu dituzte, eta ia zortzi asteburuz jarraian emango dituzte kontzertuak Euskal Herrian barrena.

Lehen geldialdia Getariako jaietan egingo dute –abuztuaren 4an– eta jarraian beste bi kontzertu egingo dituzte Gipuzkoatik irten gabe: Añorgako gaztetxean –abuztuaren 11n– eta Aretxabaletako andramaixetan –abuztuaren 14an–. Jarraian, Bizkaia eta Nafarroa aldean arituko dira: Tafallako festetan –hilaren 17an–, Bilboko jaietan –21ean–, Iruñean –31n– eta Lekeitioko jaietan –irailaren 8an–. Kontzertu birako azken bi emanaldiak etxetik gertu egingo dituzte: Arrasateko Elkartasun Egunean –irailaren 15ean– eta Oñatiko San Migel jaietan –irailaren 29an–.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa