Udalak hartutako jarrera salatu nahi dute langileek: "Enpresak aldi bateko gaixotasunak %75ean ordaintzeko prest zeudela argitu zuen, baina langileek behin eta berriz esan dugu etxez etxeko lan baldintzak ez direla horrekin konpontzen. Udalak Clece enpresa presionatu ordez, langileen ordezkariak konbentzitzen saiatu ziren behin eta berriz negoziazioan mahai gainean dagoena sinatzeko, enpresaren aliatu bihurtuz", adierazi dute prentsa ohar bidez.
"Gatazkaren konponbidea" hitzarmen batean
"Zaintza lanak, hain beharrezkoak, hain funtsezkoak badira Arrasateko herriarentzat, uztailak 10eko Udal batzarrean adierazi zuten bezala, zergatik gaude langileak egoera honetan? Non daude Udalak hartutako konpromiso politikoak martxoaren 8an emakume eta gizonezkoen arteko soldata arrakalari aurre egiteko?", galdetu gura izan diete, eta gaineratu "gatazkaren konponbidea" hitzarmen batean dagoela: "Etxez etxeko laguntzako lan baldintzak arautuko dituen hitzarmen batean, ez besterik – izan ordu publiko, izan ordu pribatuak–". Eta Clecek ez duela horren gainean hitz egin nahi adierazi dute.
Udalak esandakoarekin ez dira konforme agertu: "Udalak dio ezin duela ezer egin arlo pribatua arautzeko. Lizitazioaren prezioa igoko duela adierazi du, baina praktikan igoera hori ez da erreala, ordu pribatuak baitira gure ogibide. Argi daukagu hori prekarietatearen aldeko hautua egitea dela". Langileek gaineratu dute eurek ez dutela hautatu halako egoeran egotea eta konponbidea ez dagoela euren esku.