Asteburu berezia da hau Kanpanzar ART-rentzat, eta disfrutatzera irteten dira jokalariak. "Azoka tarteko, asteburu polita izaten da guretzat eta irabazi ez arren, gustura egoteko moduan gaude. Asteburua eguenean hasi genuen, karpan laguntzen, eta atzo ere karpan egin genuen lan. Ondoren parranda apur bat ere bai. Beraz, normalean baino astunago geunden gaur", azaldu du Aitor Lezamizek, taldeko jokalarietako batek.
Badute zer ospatu. Izan ere Euskal Ligako lehen mailari eustea lortu dute, eta pozik egoteko moduan daude Igor Isasiren mutilak. "Urte oso ona izan da. Bikain hasi genuen denboraldia eta bukaeran gehiago sufritzea tokatu zaigun arren, taldea pozik egon daiteke urte osoan egindako lanagatik", azpimarratu du Lezamizek.
