Ostiral arratsalde pasa ederra egin dute herriko gazteek Arrasate Herri Eskolakoek antolatu dute festa gunean. Seber Altube plaza eta Biteri etorbidea gazteentzako jolas-gune bihurtu dira, era askotariko jolas eta tailerrekin.
Seber Altuben kantuan eta dantzan aritu dira gaztetxoak Txatxilipurdiko kideek antolatu duten karaokean. Bertan egon dira henna eta aurpegi margotze tailerrak ere, eta bertako arduradunek gogotik egin dute lan, haurren ilarak amaigabeak izan baitira.
Biterin askotariko jokoak jarri dituzte. Puzgarriez gain, pedalka dabiltzan kartak, eta salto-salto erraldoi bat ere jarri dituzte, besteak beste. Gurasoentzako txosna bat ere jarri dute, egarri eta gosea asetzeko. Garagardoak, freskagarriak, eta txorizo pintxoak zeuden aukeran, eta baita te eta infusio exotikoak ere.
5. eta 6. mailako ikasleen eskariei men eginez, Arkada Socialeko kideek hartu dute parte gaurko ekitaldian. Seber Altubeko oholtza gainera igo dira, baina ez abesteko eta gitarra jotzeko, opariak banatzeko baizik. Taldeari buruzko galderak asmatzen zituzten gaztetxoei, diskoak eta pegatinak oparitu dizkiete. Arkada zale izandako guraso asko zeuden ikusleen artean, eta agerian geratu da horien seme-alabengan ere pasioa pizteko gaitasuna dutela.
Gaurko jaiarekin gozatu duten askok beste hitzordu bat izango dute domekan, Lekeition ospatuko den Euskal Eskola Publikoaren festa erraldoian.
