Uda giroa nabaritzen hastearekin bat, Beste Bat! taldekoei urteroko jaieguna ospatzea tokatzen zaie. Goizetik gauera arte iraungo duen festa antolatu dute, eta askotariko osagaiak izango ditu: futbola, jana, edana, musika eta, nola ez, umore ona.
10:00etan, areto futbol partidua jokatuko dute Zaldibarren; Arrasateko Beste Bat! taldekoak eta St. Pauli Catalunyakoak arituko dira nor baino nor gehiago. Izerdia bota ostean, poteoa hasiko dute, 13:00etan, Trakatraka elektrotxarangaren laguntzarekin.
15:00etan, talde argazkia aterako dute Seber Altuben, eta, jarraian, bazkariaren txanda izango da. 18:00etan, Taupa tabernako oholtzan kontzertuak hasiko dira. Sindy Berbenas arrasatearrek, Karne Cruda kantabriarrek eta Jolly Roger kataluniarrek joko dute bertan.
