Hondakin bilketako ibilgailuaren argazkia dela-eta, oharra bidali du Mankomunitateak

Sare sozialetan zabaldu den argazkia.

Mankomunitatearen bilketa kamioi baten argazkia zabaldu zen aste bukaeran, zenbait sare sozialetan. Argazki horretan, enpresen edukiontziak atez-ate biltzen dituen kamioia ikusten da Arrasateko Musakola auzoan, edukiontzi gris bat eta hori bat batera husten; eta pasa den ostiraleko data dauka. Birziklapena zuzen egiten ez dela iradokitzen duen argazkia izanik, Mankomunitateak hori argitu nahi izan du.

Mankomunitatearen azalpena

"Debagoieneko Mankomunitatetik argitu nahi dugu hondakin frakzioak ez direla nahastu, bi edukiontzi horiek errefusez beteta baitzeuden. Izan ere, erabiltzaile batzuek lehendik zeuzkaten edukiontziak beste frakzio bat ateratzeko berrerabiltzen dituzte (kasu honetan adibidez, beraien edukiontzi horia errefusa ateratzeko erabiltzen dute, zein frakziotarako erabiliko den era egokian adierazita, beheko argazkian ikus daitekeen moduan).

Bestalde, argitu nahi dugu mankomunitateko biltzaileek edukiontzi guztiek barruan zer daukaten begiratzen dutela edukiontzia hustu aurretik, eta dagokion frakzioa egoki bereizita ez badago edukiontzi hori ez dela husten. Kasu horietan, gainera, intzidentziaren partea bidaltzen zaio erabiltzaileari, bere edukiontzia zergatik ez den hustu azalduaz.

Bukatzeko, herritarrei dei egiten diegu arduraz jokatzen jarraitzera, Debagoienak hondakinen gaikako bilketan erreferente izaten jarrai dezan".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.