Maila autonomikorako igoera erabakiko den partiduan egongo da Alkideba Ointxe

Julen Iriondo 2018ko mai. 19a, 19:38

Iturripen jokatutako lauko finaleko finalerdian arrasatearrek 70-52 irabazi diote Zarautz Zast-i. Neurketa ondo hasi ez arren, atsedenaldiaren aurretik aldea hartu dute, eta ostean partidua erabakita utzi. Donostian izango da bihar finala, Donosti Dolphins taldearen kontra.

Urduri hasi dute finalerdia Ointxekoek, eta lehen laurdena atzetik amaitu dute: 17-20. Erreboteek ihes egiten zieten defentsan, baina hori konpondu eta atzeko lana funtzionatzen hasi den orduko aldatu dira gauzak. Zazpi puntuko aldea hartu dute atsedenaldirako, erasoan gauzak ondo atera zaizkie-eta.

Hirugarren laurdenean are argiago geratu dira gauzak, eta azkenekoari 13 puntuko aldearekin ekinda, azken minutuak estutasunik gabe pasa ahal izan dituzte etxekoek; intentsitaterik jaitsi gabe, hala ere, ligan zehar gertatu izan baitzaie alde handiekin irabazten joan, lokartu, eta azkenean partidua galtzea. Eta halakorik ez zuten nahi, gainera kontuan izanda fase erregularrean Iturripen irabazteko gai izan den talde bakarra zela Zarauzkoa.

Azkenean ez da ezusterik izan. Aipatzeko bestea, giro ederra izan dela Iturripeko harmailetan, eta etxeko zaleen laguntasuna gogotik eskertu du Alkideba Ointxek.

Beste finalerdian Donosti Dolphinsek 68-60 irabazi dio Alde Zaharrari. Eurak izango dira, beraz, arrasatearren aurkari bihar Gasca kiroldegian jokatuko den finalean. Maila autonomikorako txartela egongo da jokoan. Autobusa antolatu dute taldea animatzera joateko. 20:00etan da norgehiagoka. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak