Gipuzkoako senior mailako talde onenak zein baino zein gehiago izango dira asteburuan, eta gainera, Lauko Finaleko finalerdiak Iturripen jokatuko dituzte bihar, zapatua. Eta, Ointxe! Alkideba, Zarauzko Zast, Donosti Dolphins eta Alde Zaharra taldeek jokatuko dute mailaz igotzeko fase erabakigarrian.
Finalak Gasca kiroldegian
Bada, bihar 16:00etan Ointxe! Alkidebakoen txanda izango da; Zarautzeko Zast taldea izango dute aurkari. Ostean, 18:00etan, Alde Zaharra eta Donosti Dolphins taldeak izango dira nor baino nor gehiago, finalerako txartela lortzeko lehian. Hori horrela, Iturripeko kanporaketak gainditzen dituztenek jokatuko dute finala, domekan, 20:00etan, Gasca kiroldegian, Donostian. Ointxe!-k finala ikustera joateko autobusa jarriko du, baldin eta etxekoak finalerako sailkatzen badira. Autobusa, domekan 16:30ean abiatuko da Iturripetik, eta 2 euroko kostua izango du. Joateko interesa duenak idatz dezala, gaur, hona: ointxe@ointxe.eus.
Kadeteak Espainiako Txapelketara
Domekan jokatuko dute Huelvan Espainiako kadete mailako txapelketa, eta bertan izango da EAEn lehenengo postuan geratu den Ointxe! Araski taldea. Hala, Iñaki Ogararen neskek domekan (09:30) Movistar Estudiantes taldearen kontra jokatuko dute. Astelehenean, hilak 21 (09:30) Bosco Salesiano izango dute aurrean, eta martitzenean Sant Josep (11:30).
