goiena.eus

Sortuk Miribillan egingo duen ekitaldi nazionalerako autobusa antolatu dute Arrasatetik

  Politika  Arrasate

'Baietza sortzen' izena duen ekitaldia Miribilla auzoko Bilbao Arenan egingo dute, maiatzaren 19an, 17:30ean. Arrasateko autobusa 16:00etan irtengo da, Garibaitik, eta bertara joan nahi dutenek Iratin Tabernan izango dute izena emateko zerrenda.

Hona hemen, Sortuk ekimen honi lotuta plazaratu duen prentsa oharra bere osotasunean:

"Ireki berri den aro berriari bultzada emateko 'Baietza Sortzen' ekitaldi nazionala egingo dugu maiatzaren 19an Miribillako Bilbao Arenan.

ETAren desagerpenak testuinguru berri bat ireki du Euskal Herrian. Bukatu da erakunde horren ibilbidea eta ETArik gabeko garaian sartuak gaude dagoeneko. Batzuek itsu eta gorrarena egin nahi badute ere, ETA desagertu da eta etorkizunari ate berri bat zabaldu dio. Etorkizun horrek elkarbizitza eredu demokratikoan oinarrituta egon beharko du eta Euskal Herria demokratizatzeko pertsona guztiek eskubide guztiak izan beharko dituzte. Horrez gain, herri honek bere etorkizunari buruz galdetua izateko eskubidea ere izan beharko du.

Egindako lana gogoan, ezker abertzaleko gizon eta emakumeok etorkizun berri hori eraikitzeko gure konpromisoa berresten dugu. Geurea herri bizia da, amets egiten duena, aspirazioak dituena. Guk lanean jarraitu nahi dugu pertsona librez osatutako jendarte librea lortzeko.

Zergatik eman behar diogu bultzada aro berri bati? Etorkizuna parez pare irekia izan nahi dugulako; bultzada berria behar dugulako; bake osoa, iraunkorra eta justua lortu nahi dugulako; eta baita ere, herri gisa askapen nazional eta sozialean aurrera egiten jarraitu nahi dugulako.

Aro berri bat Euskal herriko herritarrek eta bereziki herritarrek eraiki duten egoera da. Ezker abertzaleko gizon eta emakumeok gure konpromisoa eta aurrera begirako erronkak jarri nahi ditugu mahai gainean. Iraganeko sinbolo eta oinarrien gainean, etorkizuneko ezker abertzalea irudikatzen saiatuko gara.

Historikoki ezker abertzalearen ondoan egon diren munduko zenbait askapen mugimendutako ordezkariak etorriko dira, hala nola, Nikaragua, Uruguay, Bretainia, Korsika, Kolonbia eta Irlandako lagunak.

Borrokarako konpromisoa eta ilusioa berritzeko garaia da beraz. Bide horretan, maiatzaren 19an, 'Baietza Sortzen' goiburupean ekitaldi jendetsua egingo dugu Bilboko Miribillan (Bilbao Arena), 17:30etatik aurrera.

Autobus zerrendak ohiko lekuetan aurkituko dituzue eta Miribillan haurren txokoa jarriko dugu martxan.

Animatu zaitez 19an Miribillara etortzen eta zabaldu deialdia lau haizetara!"

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa