Ford Mugarrik jokatuko du Lehenengo Maila Nazionalera igotzeko fasea

Arrasatearrak, garaipena ospatzen.

Txikipolit ZKE mendean hartu dute arrasatearrek aurre-faseko finalean (28-27), eta garaipen horri esker, Lehen Maila Nazionalera igotzeko fasea jokatuko dute maiatzaren 12an eta 13an –lekua eta aurkariak oraindik zehazteke daude–. Josu Herrero taldeko kapitaina "pozik" azaldu da, eta orain "disfrutatzea" tokatzen dela aitortu du.

Beldur apur batekin hasi du partidua Ford Mugarrik eta zarauztarrak aurretik jarri dira (4-8). Hala ere, arrasatearrak ez dira partidutik irten, eta atsedenaldira hiru goleko aldearekin iritsi dira (15-12). Bigarren zatian uneoro aurretik joan da Ford Mugarri, eta bukaeran Txikipolit ZKE-k markagailua makilatzea lortu badu ere, nahiko garaipen erosoa lortu dute arrasatearrek.

Josu Herrero taldeko kapitaina gustura azaldu da garaipenarekin. "Zarautzen aurka ligako bi partiduak galdu ostean, bagenekien hau ere zaila izango zela. Baina, aurrekoan ere esan nuen taldea oso ondo iritsi dela denboraldi amaiera honetan eta hori argi geratu da", adierazi du.

Etxean jokatzea eta Iturripe horrela ikustea "plazera" dela aitortu du Herrerok. "Gazteak eta gazteak ez direnak, guztiak gu animatzen ikusteak hunkitu egiten du".

Lehen Maila Nazionalera igotzeko faseari dagokionez, "disfrutatzera" joango direla dio. "Igotzen bagara, ondo, baina disfrutatzea izango da lehentasuna. Bagenekien batzuentzat azken denboraldia izango zela, eta eskubaloia modu honetan uztea bezalakorik ez dago. Beraz, pozik nago".

 

Erlazionatuak

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.