Izena emandako 350 lagunetik 330 elkartu dira irteera puntuan, eta gogotsu ekin diote lasterketari guztiek. Uste baino lokatz gutxiago topatu dute ibilbidean, eta ondorioz, gustura jardun dute lasterka gehienek. Julen Larruzeak hasieratik hartu du aurrean, eta Udalan, Besaiden, zein Udalatx gailurrean elkartutako ikusleek "hegan" pasatu dela adierazi dute. Aurretik, sekula egon barik zegoen Larruzea baina astean ibilbidea ezagutzera etorri zen: "Ostegunean etorri nintzen ibilbidea ezagutu eta estrategia zehazteko. Orduan, gaur baino okerrago zegoen, eta puntu arriskutsu batzuk ikusi nituen. Gaur askoz hobeto zegoen eta topera joan naiz", zioen bukaeran.
Haren atzetik lehian jardun dute Kortabarria arrasatearrak eta Garai oñatiarrak, eta helmugan, gehiago izan da arrasatearra.
Emakumezkoen artean, ostera, Zabala arrasatearraren eta Lendinez elgoibartarren artean egon da lehia. Udalatxerako igoeran gehiago izan da Lendinez, kilometro bertikalak egiten eskarmentu handia baitu, baina beherantz korrika Zabalak ihes egin die. Lesio batetik ondo sendatu barik egon arren samur irabazi du arrasatearrak. Bi horien atzetik sartu da Casado.
Lasterkariak zein antolatzaileak pozik
Lasterkariak pozik agertu dira ibilbidea uste baino hobeto (lokatz gutxiagorekin) topatu dutelako eta eguraldiak lagun egin dielako, baita ibilbide guztian izan den paregabeko giroagatik ere. Ezbehartxoren bat edo beste egon da; Josu Fernandez lasterkariak min hartu du sorbaldan eta helikopteroan eraman behar izan dute Debagoieneko ospitalera, eta beste pare batek hanka bihurritu dute.
Antolatzaileak, Mondraitz elkarteko kideak, ere pozik ziren bukaeran, hilabeteetako lanaren emaitza "bikaina" izan delako beste behin. Datorren urtean bosgarrena jokatuko da, eta ordurako nobedadeak iragarri dituzte.
Hemen sailkapeneko lehen hamarrak:
| Julen Larruzea | Larrabetzu | 01:47:39 |
| Aritz Kortabarria | Arrasate | 01:55:03 |
| Jokin Garai | Oñati | 01:55:22 |
| Mikel Zubiria | Aretxabaleta | 02:05:49 |
| Igor Olalde | Aretxabaleta | 02:06:14 |
| Ander Nafarrate | Arrasate | 02:06:23 |
| Ander Garitagoitia | Mallabia | 02:06:52 |
| Mikel Zabalegi | Ordizia | 02:07:26 |
| Inaxio Santxez | Gasteiz | 02:07:31 |
| Javier Irazabal | Elorrio |
02:07:59 |
| Ane Zabala | Arrasate | 02:23:58 |
| Ainhoa Lendinez | Elgoibar | 02:25:56 |
| Isa Casado | Arrasate | 02:30:35 |
| Onditz Iturbe | Igorre | 02:33:40 |
| Elena Frechilla | Sondika | 02:37:32 |
| Ainara Uribarri | Oñati | 02:39:23 |
| Miren Apraiz | Arrasate | 02:42:15 |
| Maite Zabaleta | Aretxabaleta | 02:48:55 |
| Oihana Aragones | Aretxabaleta | 02:53:39 |
| Ihintz Bengoa | Arrasate | 02:55:31 |
Eta osorik sailkapena hemen.
