Zapatuan Loiolan jokatu zituzten eskuz binakako partiduetan Antzuolako eta Arrasateko ordezkariak egon ziren. Kadete mailako finala arrasatearren arteko derbia izan zen, batetik Arrasate K1 taldea, Mikel Goñi eta Manex Bengoa pilotariekin, eta bestetik, Arrasate K2, Ibai Etxebeste eta Ibai Irasuegi bikoteak osatuta. Oso partidu parekatua izan zen baina garaipena Goñik eta Bengoak eskuratu zuten puntu bakarreko aldearekin; 16-15 bukatu zen kadete mailako finala.
Infantil mailakoek lehenik finalerdiak jokatu zituzten; Antzuola 1 bikoteak -Unax Errasti eta Nagore Galeano- Izurun 1 taldearen aurka lortu zuen finalerako sailkatzea, 16-14 irabazita. Finalean Izurun 3 taldea -Eneko Lopetegi-Xuban Goikoetxea- izan zuten aurrez aurre antzuolarrek, eta 11-16 galdu zuten.
Bestalde alebin mailako finala Pello Errota-Asteasu taldeak -Oihan Lanzeta eta Aimar Segurola- irabazi zuen, Jakintza 5D taldearen aurka.