Haurren jolas librea ardatz harturik, tailerra edo hitzaldia eskaini du gaur Plisti-plasta elkarteko (Heziketa Espazioa Naturan) Txusma Azkona nafarrak. Jardunaldiak arrakasta izan du, eta 50 guraso eta hezitzaile inguru gerturatu dira Etxaluzera. Haurrek gainera, jolasteko txokoa izan dute bertan.
Txatxilipurdiko kideak "oso pozik" azaldu dira herritarrek izandako erantzunarekin. "Jolas librearen garrantziaren inguruko jardunaldiak antolatu ditugu, eta gaur izan da bigarren hitzordua. Hurrengo hilabeterako mahai-inguru bat ere antolatuko dugu gai berdinaren inguruan hausnartzen eta ikasten jarraitzeko. Gaiak interesa pizten duela ikusten dugu, eta tailerra azkar bete zen. Profil anitzeko jendea batu da gainera eta hori ere oso interesgarria zen guretako", azaldu du Txatxilipurdiko Amaia Etxabek.
