Urtetik urtera, parte hartzea handitzen ari dela azaldu du Anibal Carmonak, Artgazki elkarteko presidenteak, eta hori pozgarria dela azpimarratu du. 288 argazki aurkeztu dira aurten, eta horietako 45ekin erakusketa bat egin dute urtarrilean zehar, herriko denda eta taberna ezberdinetan ikusgai egon dena. Orain, berriz, erakusketa Kulturateko klaustrora pasatu dute eta otsailaren 17ra arte egongo da zabalik, astelehenetik zapatura, 17:30etik 20:30era. Ikusgai egoteaz gain, salgai ere badaude argazkiak, formatu eta kalitate "bikainarekin", Carmonaren esanetan. Elkarteko presidenteak azaldu duenez, 45 lanetatik 30 inguru salduta daude dagoeneko, eta dio seguruenik gehienak salduko direla.
Aspanogi elkartearentzat
Erakusketako lan bakoitza 30 euroan saltzen ari dira, eta salmenta honetatik ateratako dirua Gipuzkoako Haur Minbizidunen Elkartera –Aspanogi– bideratuko da "ehuneko ehunean". Carmonak adierazi du, "dirua beti ondo" datorren arren, elkarteari gehiago inporta zaiola gizartearen aurrean elkartea bera eta egiten duen lana azaleratzea. "Guk helburu horrekin egiten dugu. Nik uste dut gure ekimenak laguntzen duela, hein batean, Aspanogi elkartea ikustarazten", nabarmendu du.
