Preso jarraitzen duten hiru arrasatearretatik bat aske geratuko da 2018an

Xabi Gorostidi 2018ko urt. 11a, 16:21

Julen Mendizabalek maiatzaren 7rako dauka ezarrita irteera data, bost urteko espetxealdia bete ostean. Josu Arkauzen eta Unai Paroten irteera datak gehiago berandutuko dira, eta bizi duten "salbuespen egoera" salatu dute presoen aldeko eragileek.

2017an zehar lau preso arrasatear geratu dira aske. Kepa Arkauz izan zen horietan lehena, irailaren 21ean; gero, Aratz Gomezen txanda izan zen, urriaren 19an; eta azkenik, Premin Sanpedro eta Txus Goikoetxearena, abenduaren 20an. Irailetik abendura preso kopurua zazpitik hirura pasa da. Unai Parot, Josu Arkauz eta Julen Mendizabal dira espetxean jarraitzen dutenak, eta hau da haien egoera.

Mendizabal aske maiatzean

Julen Mendizabal Osnyko espetxean dago preso, eta maiatzerako du ezarrita irteera-data. 2013ko maiatzaren 7an atxilotu zuten, eta justu bost urte geroago geratuko da aske. Zazpi urteko espetxe zigorra bete behar zuen, baina ikasketengatik hainbat egunetako erredentzioa jasotzeko eskubidea dagokio.

Josu Arkauz izango litzateke, hasiera batean, aske geratzen hurrengoa. Gaur egun, Murcia II espetxean dago, eta 2023rako dauka ezarrita irteera-data. Ordurako, 32 urte egingo lituzke preso. Presoen aldeko eragileek jakinarazi dutenez, Europako legediak dioena betez gero, 2015a ezkero egon beharko luke aske, Frantzian egindako espetxe urteak eta Espainiako zigor kode zaharrak barne zituen erredentzioak kontuan izanda.

Unai Parotek 2020an aske geratu beharko luke, 30 urte preso egon ostean. Baina espetxean ustez aurkitutako gutun baten ondorioz, 2020an hamabi urteko beste espetxe zigor bat hasiko luke, "mendekuz sorturiko" zigor kodearen aldaketa baten ondorioz, presoen aldeko eragileek adierazi dutenez. Gaur egun, Puerto III espetxean dago: "Oso baldintza gogorretan".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak