Premin Sanpedro eta Txus Goikoetxea irten dira kartzelatik

Ia 17 urteko espetxealdia egin ondoren gaur goizean aske geratu dira bi arrasatearrak. Senideak eta lagunak zain izan dituzte Jaeneko eta Sevillako kartzeletan, eta gau partean helduko dira Arrasatera. Orain hiru dira kartzelan jarraitzen duten herriko presoak: Josu Arkauz, Unai Parot eta Julen Mendizabal.

2001eko ekainean atxilotu ondoren, gaur geratu dira aske Txus Goikoetxea eta Premin Sanpedro preso arrasatearrak. ETAko komando ibiltari bateko kide izatea leporatuta atxilotu zituzten. Operazio horretan Ivan Astondoa, Nerea Hernandez eta Natale Landa ere atxilotu zituzten, baina epaileak aske utzi zituen, nahiz eta Natale ondoren kartzelan sartu zuten Ekin-eko kide izateagatik.

Goikoetxeak eta Sanpedrok ia 17 urteko kondena bete dute, eta tarte horretan hainbat espetxe aldaketa jasan dituzte. Sanpedroren kasuan, sei espetxe ezagutu ditu: Soto del Real, Aranjuez, Asturias, Algeciras, Granada, Jaen. Goikoetxearen kasuan bost: Soto del Real, Aranjuez, Albacete, Puerto de Santa Maria, Sevilla. Gaur, hamasei urte pasatxoren ostean, berriro ikusiko dute elkar.

Arrasatera bidean

Irudia: Senide eta lagunak preso arrasatearrak irtetearen zain.

Sanpedrok eta Goikoetxeak hainbat senide eta lagun izan dituzte Jaeneko eta Sevillako espetxetako ateetan zain, eta jada Arrasatera bidean daude denak. Bidai luzea dute aurretik, baina gaur bertan Arrasatera heltzea espero dute.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.