Azkar batean esaten da, baina hogei urte urte asko dira. Hain zuzen ere, bi hamarkada betetzen ditu aurten Arrasateko mintzalagunak elkartzen dituen Zahar Berri egitasmoak. Arduradunen esanetan hogei urteotan 600 bat lagun pasa dira mintzalagun taldeetatik eta gaur horietako batzuk elkartu dira Kulturateko areto nagusian urteurrena ospatzeko eta elkarrekin une atsegin bat pasatzeko. Noski, euskaraz.
Arduradun moduan Aitor Juaristik hartu du hitza ekitaldiaren hasieran eta mintzalagun guztiek egindako ahalegina aitortu eta eskertu du. Hogei urteotan ateratako hainbat argazkirekin eskertu nahi izan du parte hartze hori.
Jarraian, Barry Manley irlandarrak hartu dio lekukoa. Donostian bizi den euskaltzaleak umorezko bakarrizketa eskaini du musika apur batekin tartekatuta. Euskararekin egin du umorea eta mintzalagunen egunerokoan nahikoa buruhauste eragiten dituzten ergatiboa, baldintza eta beste izan ditu umorerako bide.
Une atsegina izan da guztiendako.