Herriko eragileei deia Mundu Mailako Gizarte Ekonomia Foroan parte hartzeko

2018an Bilbok hartuko du mundu mailako foro hori, Arrasateko Udalaren laguntzarekin. Urriaren 1 etik 3ra mundu osoko eragileek 'lehiakortasuna eta balioak, tokiko garapen jasangarri eta inklusiboa' gaiaren inguruan jardungo dute, eta Arrasateko enpresek zein eragileek bertan parte hartzeko aukera izango dute. Interesa dutenek abenduaren 21era arte dute zabalik izen ematea.

Bi urtean behin antolatzen den foro honen azken edizioa Montrealen egin zen, eta bertan Bilbok hurrengo edizioa antolatzeko hautagaitza aurkeztu zuen, Arrasateko Udal ordezkariekin batera. Bartzelona bezalako aurkari indartsuekin lehiatu arren, Bilbo izan zen garaile, eta kongresu hori hartuko duen Europako lehen hiriburua bilakatuko da.

"Enpleguan, kalitatean eta ongizatean eragina duten esperientziak eta jakintzak partekatzea helburu duen foroa da. Gaur egun Gizarte ekonomiaren alorrean Montreal bada Amerikarentzat erreferente nagusia eta Seul, Asiarena, Euskadi, Europaren erreferente izango da eta eginkizun honen baitan Arrasatek izen propioa izango du" azaldu dute Udal gobernutik.

"Dagoeneko egitarauaren antolaketa lanetan hasita dago Udala, bai foroan jorratuko diren gaiak zehazten, jardueren programaziorako proposamenak aztertzen, baita parte hartu nahi luketen eragile desberdinak bertara konbokatzen. Ohar honen bidez Arrasateko Udalak GSEF2018rako deia luzatu nahi die bertako
gizarte ekonomia arloan lan egiten duten herriko elkarte eta enpresa guztiei foroan parte hartzeko, euren esperientziak, egitasmoak edo proposamenak bertan erakusteko".

Bertan euren esperientziak partekatu nahi dituzten eragileek euren proposamenak aurkeztu beharko dituzte BAZen abenduaren 21a baino lehen. Bilboko foroari buruzko informazio gehigarria nahi izanez gero, egin klik hemen.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.