Ane Irazabal saritua Euskal Kazetaritza sarietan

Erabakita daude dagoeneko Euskal Kazetarien Elkarteak eta Kazetarien Euskal Elkargoak banatzen dituzten aurtengo Euskal Kazetaritza Sariak. Euskal Kazetariak atalean izan da saritua Ane Irazabal, guda eta gatazka zonaldeetan egindako lanagatik. Arrasatearraz gain, Gervasio Sanchez, Mariano Ferrer, Iñaki Iriarte, Euskal Herriko Bertsolari Txapelketa eta Mikel Iturralde ere izan dira sarituak.

Bilbon gaur goizean jakinarazi denez, Euskal Kazetarien Elkarteak eta Kazetarien Euskal Elkargoak antolatutako Euskal Kazetaritza Sariak 2017, BBKren, Euskaltelen eta Bilboko Udalaren babesarekin, eta LOGI Expressen laguntzarekin egin direnak, badituzte irabazleak. Horien artean dago Ane Irazabal, Euskal Kazetariak atalean. Atal honetan, kazetaritzako lanbiderako eredu diren profesionalak saritzen dira, Euskadin, maila nazionalean edota nazioartean egindako lanagatik. Kasu honetan, guda eta gatazka zonaldeetan egindako lanagatik saritua izan da Ane Irazabal. 

'Adierazpen askatasunaren Jose Maria Portell' saria Gervasio Sanchezi egokitu zaio, gatazka armatuetan egindako lanagatik. 'Ibilbide profesionala' ataleko saria berriz, Mariano Ferrer eta Iñaki Iriarterentzat izan da, Egin eta Deia egunkarien jaiotzaren 40. urteurrenean bi zuzendariak sarituz. Euskal Herriko Bertsolari Txapelketak eraman du 'Pertsonaia/Giza instituzioari' saria, komunikabideekin duten harremanagatik eta komunikazio on baten bitartez, euskal kulturaren zati bat berreskuratzen laguntzeagatik. Azkenik, 'Kazetaritza Digitala' saria Mikel Iturralderentzat izan da Treneando blogagatik.

Sarituak Euskal Autonomia Erkidegoko hainbat komunikabideetako ordezkariek osatutako epaimahai batek aukeratu ditu. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.