19:00etan ekingo diote festari ikurrinaren igoerarekin eta etxafuegoen eztandarekin. Meza ere egingo dute ordu berean, eta 20:00etan Patxixenan buzkantz-jana egingo dute, trikitilariek kalejira egiten duten artean. Behin buzkantzak bapo janda, kontzertuen txanda izango da. Libertad Condicional eta The Hans Blues Band talde mondragoetarrak igoko dira oholtzara, 22:30ean.
Zapatuan eta domekan ere bai
Larunbat goizean umeentzako jolasak jarriko dituzte, 11:30ean. Arratsaldean Gorriti eta bere animaliek geldialdia egingo dute Garagartzan, eta 20:00etan, berriz egingo dute buzkantz-jana Patxixenan. 22:30ean hasiko da Buzkantza Rock jaialdia; lau talde izango dira: Drop, Sindy Berbenas, Iruñeko Against You eta Iskanbila talde mitikoa.
Domeka goizean, meza, luntxa eta euskal dantzak egongo dira. Horien ostean, festei datorren urtera arte agur esan aurretik, auzoko bazkaria egingo dute, 15:00etan.
