Ertzaintzak txirrindulari bat erreskatatu du Anporretan

Mendi pista batean erori eta zaurituta zegoen gizona Debagoieneko Ospitalera eraman behar izan dute Zaintza eta Erreskate Unitatekoen helikopteroan. Goizean gertatu da istripua.

Goizeko hamaikak aldera jaso dute abisua larrialdietarako 112 telefono-zenbakian. Herritar batek deitu du esanez bizikletan zebilen gazte bat erori dela Arrasateko Anporreta mendian, eta besoan min handia omen zuela.

Hala, larrialdietarako hainbat baliabide bideratu dituzte bertara, besteak beste, suhiltzaileak, Udaltzaingoaren lur orotako ibilgailu bat, Zaintza eta Erreskate Unitateko ertzainak helikopteroan eta osasun-langileak.

Behin zauritua aurkitu eta esku-ohe batean jarri ondoren, helikopterora eraman dute, eta honek Arrasaten utzi du. Azkenik, anbulantzia batek eraman du 34 urteko gaztea Debagoieneko ospitalera.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.