Lehenengo hamar minutuak bakarrik izan dira parekatuak; izan ere, ondoren aurretik jarri da Ford Mugarri Arrasate eta lau bat goleko aldearekin izan da uneoro atsedenaldira arte (14 eta 10).
Bigarren zatian ere antzera jardun dute, eta Deusto Loiola Unibertsitatea ezin izan da berdintzera ere hurbildu; bukaeran: 27 eta 22. Larritasunik ez dute pasatu etxekoek, urduritzeko arrazoirik ere ez dietelako eman bizkaitarrek, baina oraindik erritmoa hartu beharra dutela agerian geratu da.
Denboraldiko lehenengo garaipena beti dela garrantzitsua adierazi du Mikel Zuloaga jokalariak, bi urte kanpoan pasa ostean etxera etorri berri denak, baina oraindik lan asko dutela egiteko onartu du. Pausoz pauso aurten ere goiko postuetan izateko gogotsu ekin dio ligari Ford Mugarri Arrasatek.