Bart Arrasateko batzokiaren fatxadan egin zituzten pintaketak salatzeko EAJren Gipuzkoa Buru Batzarrek zera adierazi du prentsa-ohar batean: "Benetan deitoragarria da oraindik orain hitza eta elkarrizketa jorratu beharrean irain eta mehatxuaren bidea –hori bai, ezkutuan- erabiltzen dutenak izatea gure artean".
"Gisa honetako gertakariak, urteetan pairatu behar izan dugun estrategia politiko-militarraren hondarrak dira, zeinaren ondorioak oraindik ere pairatzen ditugun. Horrengatik, EAJ-PNV-k Herri honen gogoen kontra doazen ekintza eta joera hauek gaitzetsi nahi ditu", gaineratu dute jeltzaleek.
Arrasateko EAJ
Arrasateko EAJk pintaketak ''irmoki'' gaitzesten dituela azaldu du, eta gaineratu: "Iraganeko horrelako jokabideek herritargoak eskatzen duen elkarbizitza eta bakearen bidean oztopoak jartzea eragiten dute. Elkarren arteko errespetuari falta bat izateaz gain, bizikidetza kutsatu nahi duten akzioak salatu beharrean aurkitzen gara".
Arrasateko jeltzaleek adierazi dute baita ere udalean ordezkaritza duten gainerako alderdiei dei egiten dietela euren babesa eta elkartasuna publikoki erakusteko.