Komeni da gogoratzea mozio hau iraileko osokoan planteatu zitekeela, baina udalbatzak ez du ohiko osoko bilkurarik deitu irailean.
Urriaren 3an da egitekoa opor osteko lehen osoko bilkura, eta bertan mozio gisa gaia landu daiteke. Baina oposizioko hiru alderdiek ezohikoa deitzearen alde egin dute, besteak beste, urriaren 1a baino lehen eduki ahal izateko Katalunian bizi duten egoerari buruzko eztabaida.
Ezohiko osoko bat egitea eskatzeko, udalbatzako zinegotzien laurdenaren sinadurak behar dira, eta bilketa hori egin ostean bihar bertan eskaera formala egitea da oposizioko alderdien asmoa.
Behin hori eginda, alkatearen esku geratzen da ezohiko bilkura egitearen erabakia, eta horretarako 15 egun naturaleko tartea dago. Hala, urriaren 16ra arte izango luke Maria Ubarretxenak erabakia hartzeko tartea.
