Izaskun Murgia elkarte lirikoaren eta Udalaren arteko hitzarmena

Arrasaten zarzuela ekoiztu, eta elkartearen lana ezagutzera emateko asmoz egin dute akordioa. Horri esker, 12.000 euroko diru-laguntza jasoko du elkarteak, eta trukean, urtero obra bat ekoizteko eta lau emanaldi egiteko konpromisoa hartuko du Izaskun Murgia elkarteak.

"Izaskun Murgia elkarteak kultur elkarte bezala ekarpen handia egiten dio herriari, eta ildo horretan, kultura izanik Udal honen lan ardatz nagusietako bat, elkartearen lana kontuan hartuta, hori bultzatu eta ezagutaraztea ahalbidetuko duen hitzarmena sinatu nahi izan dugu, urtero bezala" adierazi dute Udaletik.

Urtean obra bat ekoizteko, eta euren lana baldintza egokietan egiteko, Amaia Udal Antzokia eta bertako langileak elkartearen mesedetara uzten ditu hitzarmenak. "Hitzarmen horren bitartez, bi aldeek bere gain hartu ditugu hainbat konpromiso, eta erakunde publiko gisa, Udalaren betebeharra da elkartearen lana bultzatu eta errazteko baliabideak haien eskura jartzea"

Izaskun Murgia elkarte lirikoa

Tere Gonzalez Arrasate Musikaleko irakaslearen ekimenari esker sortutako elkartea da, eta herrian zarzuelarekiko zaletasuna zabaltzeko asmoz urte luzez aritutako Izaskun Murgia zenari omenaldi gisa jarri zioten izena. "Arrasatek betidanik izan duen zarzuelarako grina berreskuratzeko, eta herrian dagoen hutsunea betetzeko" egiten dute lan, Arrasate Musikaleko ikasleen eta bestelako partaideen inplikazioarekin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.