Iritzi kontrajarriak Erdi Aroko Azokaren itzuleraren harira

Turismo, komertzio, teknologia berriak eta sustapen ekonomikoko zinegotzi den Victor Fuentesek "oso positiboki" baloratu du azokak izan duen inpaktua. Bestalde, Ibai-arteko zuzendaritzako kide batzuek begi txarrez ikusi dute Merke Merkauaren egun berean egin izana, eta Baleikek oharra helarazi zuen azokaren kudeaketa gaitzesteko.

Udal Gobernua pozik

Gustu guztietarako iritziak utzi ditu Erdi Azokaren itzulerak. Udal Gobernuko kide den alderdi sozialistak ohar bidez jakinarazi du "oso balorazio" positiboa egiten dutela, "turismoa bultzatzea, merkataritza lokalaren eta ostalaritza laguntzea, eta artisauen lana sustatzea" lortu delako.

Era berean, bertako saltzaile eta artisauak asetuta geratu direla adierazi du Victor Fuentes zinegotziak, eta datorren urtean berriz egiteko eskatu dietela gaineratu du.

Merke Merkauarekin talka

Ibai Arteko kide batzuek oharra helarazi zuten azoka egin aurretik, honek euren negozioak kaltetu zitzakeela esanez. Behin azoka eginda, honek Merke Merkauan eraginik izan duen galdetuta ez dute kalte handirik igarri printzipioz. "Oraindik ez gara elkarteko kideok elkartu salmentak nola joan ziren ikusteko. Baina Merke Merkaua ostiralean ere egitean asmatu egin dugula uste dugu. Azokak kalte egiteko arriskua zegoela ikusirik, ostiralean hastea erabaki genuen eta jendeak oso ondo erantzun zuen" adierazi du Arantza Arantzabal Ibai Arteko zuzendaritzako kideak. 

Baleikek, bere aldetik, oharra helarazi zuen azokaren kudeaketa "desastretzat" joz. Herriko merkatariak kontuan ez edukitzea, eta azokako ekintzak herriko auzoetara ez eramatea kritikatu zuten, besteak beste.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.