Emakumeen aurkako biolentzia protagonismo berezia izaten ari da aurten, eta hori salatzeko herriko plazan egindako elkarretaratzeak ez dira gutxi izan. Azkena gaurkoa izango da, Emakumeen Mundu Martxak deituta, domekako azken erasoa gaitzesteko.
"Erailketa matxistekin batera, emakumeen aurkako sexu bortizkeria eta eraso fisikoak dira emakume eta gizonen arteko desorekaren adierazgarri latzenak. Indarkeria matxistak, ordea, aurpegi asko dauzka eta hau errotik desagerrarazi nahi badugu, ezinbestekoa da herritarron zein erakunde publikoen erabateko erantzukizun eta inplikazioa. Gutako bakar bati erasotzen dioten artean martxan jarraituko dugu!" adierazi dute Emakumeen Martxa elkartetik.
Salaketa kopurua
Baina erasoez gain, salaketa kopurua ere bada errealitate horri neurria hartzeko beste modu bat, eta 2017ko zazpi hilabete hauek zifra kezkagarri bat utzi dute: hamabi salaketa Arrasaten, indarkeria matxistagatik.
Datu kontrastatu hori politikariekin eta eragileekin partekatu du GOIENAk, eta denek azaldu dute horrekiko kezka.
Politikarien erreakzioak
Arrasateko EAJren ustez, " Oso datu txarra da eta argi daukagu gure gizartean pairatzen dugun arazo larri bat dela. Gainera gaia larriagoa bihurtzen da, dauden datuen arabera erasotzaileak kasu askotan gazteak direla agerian geratzen denean, beti pentsatu den arren belaunaldien arteko arazoa zela".
Gaiarekin lotuta aurreratu dute, Arrasateko Udalak martxan daukala biolentzia matxistaren aurkako plan integralaren esleipena (2018 -2022), eta irailean onartuko dela. Gogoratu behar da gaur egun Udalak martxan daukan plana 2006 – 2010 urtekoa dela.
Arrasateko EH Bilduren hitzetan, "hamabi salaketen datua oso serioa eta larria" da. Horri buelta emateko egun indarrean dauden programak indartzean jarri dute fokua, eta gehitu dute gai estrukturala izanik herri osoari dagokiola horren konponbidean inplikatzea.
Baleikeren ustez egoera kezkagarria da, are gehiago kontuan izanda "eraso ugari ez direla, tamalez, salaketa fasera heltzen". Gaia konpontzeko "tresna instituzionalak martxan jarri eta areagotzea" politikarien ardura dela esan ostean, gogor kritikatu dute gai hau ez dagoela "udal gobernuaren lehentasunen artean". [Baleikek prentsa oharra atera du gai honi buruz].
Azkenik Irabazitik azaldu dute hamabiko zifra "astakeria" bat dela, eta gogora ekarri dute udal gobernuak ez duela protokoloa oraindik berritu.
