Arrasate Herri Eskolako ikasleek urte amaierako jaialdia egingo dute gaur. 14:30ean jolasak egingo dituzte Bedoñaben eta San Antolinen; eta Erguinen, aldiz, sokatira, zaku lasterketa, giza probak, lokotx-biltzea eta mota horretako herri kirolak.
Jaiak jarraipena izango du arratsaldean, eta Guraso Elkarteak hainbat ekintza prestatu ditu haurrek eta gurasoek primeran pasa dezaten. Hasteko, 16:30ean, 4 eta 5 urteko eta Lehen Hezkuntzako ikasleak Biterin batuko dira. Jarraian, Lehen Hezkuntzako ikasleek bertso saioa egingo dute, eta, horren ostean, argazki erraldoia egingo dute. Aurten ere Artgazki taldekoek egingo dute Herri Eskola osatzen dutenen familia argazkia.
Gero, mandalak, maskarak eta aurpegiak margotzeko tailerrak izango dira, eta, horrez gain, berbenatxoa, puzgarriak eta gurasoentzako barratxoa ez dira faltako; amaieran, aurretik eta egunean bertan saldutako txartelen zozketa egingo da.