Otsaileko baserritarren azokan porruak, azaloreak eta babak moduko neguko produktuak izan dira nagusi, baina urte osoan zehar ekoizten direnendako ere tokia izan da: arrautzak, haragia, gazta... Eguraldia lagun izan dute goiz eta eguerdi aldean erosleek, eta "jende dezente" animatu da, saltzaileen berbatan. Gainera, gaurkoan, Nafarroatik, Arabatik eta Ondarroatik ere etorri dira euren baserrietako produktuak saltzera.
Horretaz gain, gaurko azokan bere tokia izan du Zurekin Arrasate euskaldunago ekimenak. AED elkarteak bultzatuta, Arrasateko produktuez osatutako otarre bat zozketatu dute "Arrasate euskaldunago egiteko ideiak" eman dituztenen artean, eta argazki erakusketa bat ere antolatu dute azokaren aldamenean. Ondoren, bideo bat grabatu dute hainbat herritarrek, ekimenari beste bultzada bat emateko.
Seber Altube plazan ere, Emaus fundazioak Emaus kontenedorea jarri du. Bigarren eskuko arropak eta osagarriak, batez ere, saldu dituzte bertan, baita Inauteriei begira mozorroak ere.
