Udal Gobernuak gogora ekarri duenez, Debagoieneko Mankomunitateak eta bailarako euskara zerbitzuek egindako lanari esker, 2009an autoeskolen esku jarri zen azterketa teorikoa euskaraz lortzeko materiala: teoriko orokorreko eskuliburua, testak –ikasleek internet bidez egiten dituztenak–, multimedia programa –euskaraz entzuteko eta 3D ikusteko–, autoeskolan eduki beharreko panel informatiboak elebitan eta terminologia hiztegia, besteak beste.
Gobernuaren arabera, 2009an egitasmoa martxan jarri zenetik "nabarmen" hazi da gidabaimena euskaraz ateratzera animatzen diren herritarren kopurua: "Lehen urtean, esaterako, hamabost ikaslek egin zuten azterketa teorikoa euskaraz eta aurten, aldiz, 61 pertsona animatu dira".
Datu horiek guztiak positibotzat jo ditu gobernuak, egitasmoak "hedapen garrantzitsua eta harrera ezin hobea" duela bistako egiten dutelako. Era berean, egitasmoari jarraipena emate aldera, aurten ere, horren berri emango du euskara zerbitzuak ikastetxe eta autoeskoletan, arrasatearrak gidabaimena euskaraz ateratzera animatuz.
