Beñat Arnaizek eta Ane Zabalak irabazi dute giro paregabea izan duen Santamas krosa

Koadrilen sailkapenean, berriz, gizonezkoetan Arrasate Runners taldea izan da azkarrena, eta emakumezkoetan, aldiz, Oinazkarrak. 250 korrikalari inguruk hartu dute parte, eta ibilbidean zehar herritar mordoxka bat izan da animatzen.

Lasterketa hasi aurretik, jende ugari elkartu da Herriko Plazan, bertan baitzeuden 39. Santamas Krosean izena emateko mahaiak. Herritar ugari animatu da parte hartzera, 250 inguru. Behar zuena baino hamar bat minutu beranduago irten dira korrikalariak Maalako errebaletik; izan ere, zenbait parte hartzaile 12:30ak baino beranduxeago iritsi dira Herriko Plazatik hasiera puntura.

Bada, azkenean, guztiak hasierako marraren atzean ondo kokatuta zeudela baieztatu eta bota dute lasterketaren hasierako etxafleroa. Portaloitik gora abiatu dira korrikalariak ikusleen txalo eta animo artean. Herrigunean zehar egin dute lasterketa osoa, eta zirkuituari hiru itzuli eman behar izan dizkiote. Besteak beste, Erdiko kaletik, Olartetik edota Garibaitik igaro dira, eta bukaera, hain zuzen, Erdiko kalen izan da, Herriko Plazaren ondoan.

Hiru itzuliok osatzen azkarrenak Beñat Arnaiz eta Ane Zabala izan dira.

Koadriletan, Arrasate Runners eta Oinazkarrak

Koadrilen klasifikazioari dagokionean, Arrasate Runners taldea izan da gizonezkoetan onena, 67 punturekin. Gizonezkoetan bigarrena, berriz, Jotzaileak (90 punturekin), eta hirugarrena, Antxintxika (92 punturekin).

Emakumezkoetan, Oinazkarrak lagun taldea izan da onena, 75 punturekin. Horien atzetik, Gildak (188 punturekin) eta Girl taldea izan dira onenak (211).

Egun borobila

Lasterketa osoan zehar jenderik ez da falta izan, ez zirkuitu barruan, ezta hesiaren atzealdean ere. Eguraldi ona lagun, herritar ugari atera dira kalera beraien lagun eta familiartekoak eta lasterkari guztiak animatzera. Hain zuzen, karrera amaitzean bertan bizitako "giro berezia" nabarmendu dute parte hartzaileek.

Santamas krosa lagunartean egiteko lasterketa herrikoia da, jakina den moduan. Hala, askok eta askok lasterketa egin eta ondoren koadrilako poteoa edo bazkaria egiteko aprobetxatzen dute aitzakia.

Erlazionatuak

Santamas Kros jendetsua, ikusle eta partaide aldetik

Arrasate

Gabonetako bazkariei eta afariei lekua egiteko aitzakia perfektua hartuta, 250 korrikalari inguruk hartu dute parten aurtengo Santamas krosean. Egu...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.