Biteri haur parkea eta Itxaropena plaza eraberritzeko ideia lehiaketak baditu saridunak

Lehiaketako irabazleak.

Guztira epaimahaiak sei sari ezberdin banatu zituen. Hurrengo pausoa proposamen irabazleak aztertu eta bideragarriak diren ideiak Biterin eta Uribarrin nola gauzatu daitezkeen zehaztea izango da.

Atzo arratsean herritar ugari bildu zen udaletxeko pleno aretoan egindako sari banaketa ekitaldian. Epaimahaiak guztira sei sari banatu zituen. Modu honetan, bi guneen eraberritze prozesua bigarren fase batean sartzen da, eta irabazleen artean sortutako ideia sortarekin, udaleko zerbitzu teknikoek berrikuntzak planteatuko dituzte proiektu ezberdinen bitartez. 2017ko aurrekontuetan, halako lanak egin ahal izateko partida bat dauka udal gobernuak zirriborroetan.

Proposamen ugari

Hamar kidez osatutako epaimahaia izan da aurkeztutako 64 proposamenen artean sarituak hautatu dituena; hain zuzen, 2 udal teknikari, udaleko idazkari nagusia, 2 zinegotzi, Arrasate Herri Eskolako ordezkari bat, Arizmendi ikastolako ordezkari bat, Institutuko ordezkari bat, eta 2 herritar izan dira sarituak hautatu dituztenak. Lehiaketako partaideak bi mailatan banatu dira, 14 urte artekoak eta adin horretatik gorakoak:

 14 urtetik gorakoak:

  • 1. saria: Maria Lopez de Bergara eta Ainara Zabala (250 euro).

  • 2. saria: Goizane Atxaga (urte guztirako kiroldegiko bonoa).

  • 3. saria: Itsaso Erretolazak (100 euroko kultura bonoa).

 14 urte artekoak:
  • 1. saria: Erik Menocal (Inguru Abentura gunerako 2 sarrera).

  • 2. saria: Maddi eta Goiatz Belategi (Hotza Extreme parkerako 2 sarrera).

  • 3. saria: Ane Aranzabal, Garazi Martinez eta Eider Zugasti (Gailur Zaldiketa eskolarako 2 sarrera).

Epaimahaiak lau irizpide nagusi jarraitu ditu erabakiak hartzeko: proposamena aurrera eramateko bideragarritasuna, faktore ekonomikoak eta teknikoak, eta sorkuntza edo kreatibitatea.
 
Pasa den irailean, lehiaketara aurkeztutako lan guztiekin erakusketa egin zen Kulturateko areto nagusian. Umeen marrazkietan tirolinak, arearekin jolasteko guneak, eta itsasontzi pirata bezalako proposamenak ziren nagusi. Helduen proposamenak, berriz, landuagoak izan ziren bi guneetarako.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.