Arrasateko EAJk ohar bidez salatu du bart gauean hiru pertsonak pintura gorriko poteak bota zizkietela batzokiko bi langileri euren lanpostutik irteten ari ziren bitartean. Erasoa erabat baztertu eta salatu dute jeltzaleek eta "horrelako gertaerek berriro ere ustez gaindituta zegoen garaira" garamatzatela adierazi dute. Horrez gain, diote, "horrelako jokaerek ez dutela inolako lekurik herri demokratiko baten" eta ulertezina dela "euskal gizarteak bakea eta bizikidetza sendotzeko urratsak ematea eskatzen duelako".
EAJk nabarmendu du, errespetu falta izateaz gain, horrelako gertaerak bizikidetzaren aurkako erasoa direla, eta berretsi du, "bakean eta bizikidetzan oinarritutako etorkizuna behar duela gure herriak". Bide horretan, "salbuespenik gabe, giza eskubide oro errespetatzea" oinarrizkoa dela gaineratu du alderdiak.
Bozeramaile batzordea deitu du
Azkenik, datorren astelehenean, hilak 7, 17:30ean, "gertaera larri horiek" baloratzeko Udalaren Bozeramaile Batzordea deitzea eskatu du EAJk.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.